महावितरणच्या ढिसाळ कारभाराविरुद्ध एल्गार!

 राशिन(प्रतिनिधी – जावेद काझी) :राशीन व परिसरात मागील आठ दिवसांपासून महावितरण कंपनीचा कमालीचा ढिसाळ आणि ‘जळठाण’ कारभार सुरू आहे. विजेच्या सततच्या लपंडावामुळे आणि कमी दाबाने होणाऱ्या पुरवठ्यामुळे नागरिक, शेतकरी आणि व्यापारी पूर्णपणे हैराण झाले आहेत. हा त्रागा असाच सुरू राहिल्यास पुढील आठ दिवसांत राशीन वीज वितरण कार्यालयावर तीव्र स्वरूपाचे आंदोलन छेडण्यात येईल, असा थेट आणि आक्रमक इशारा कर्जत पंचायत समितीचे माजी सभापती पै. शामभाऊ कानगुडे यांनी दिला आहे.

या आंदोलनामुळे उद्भवणाऱ्या कायदा व सुव्यवस्थेच्या परिस्थितीला सर्वस्वी महावितरण प्रशासनच जबाबदार असेल, असेही त्यांनी ठणकावून सांगितले.जनजीवन पूर्णपणे विस्कळीत; ‘या’ प्रमुख समस्यांमुळे नागरिक त्रस्त:गेल्या आठ दिवसांपासून राशीन आणि परिसरातील वीज ग्राहकांना महावितरणने वेठीस धरले आहे. या विजेच्या खेळखंडोब्यामुळे खालील गंभीर समस्या निर्माण झाल्या आहेत:पिण्याच्या पाण्याचा प्रश्न गंभीर: वीज पुरवठा खंडित असल्याने गावातील पिण्याच्या पाण्याचे फिल्टर प्लांट बंद पडले आहेत. नागरिकांना शुद्ध पिण्याच्या पाण्यासाठी वणवण करावी लागत आहे.शेतकरी वर्गाचे अतोनात नुकसान: कडक उन्हाच्या दिवसांत पिकांना पाणी देण्याची वेळ असतानाच वीज गायब होत असल्याने उभी पिके जळून जाण्याच्या मार्गावर आहेत. शेतकरी पुरता हवालदील झाला आहे.

व्यापार आणि उद्योग ठप्प: राशीन परिसरातील मोबाईल शॉपी, इलेक्ट्रिक दुकाने, झेरॉक्स सेंटर्स, फॅब्रिकेशन आणि विजेवर चालणारे इतर सर्व छोटे-मोठे व्यवसाय पूर्णपणे कोलमडले आहेत. व्यापाऱ्यांना मोठा आर्थिक फटका बसत आहे.मोबाईल नेटवर्क आणि चार्जिंगची समस्या: वीज नसल्याने मोबाईल डिस्चार्ज होत असून, टॉवर बंद पडल्याने दळणवळण आणि संपर्क यंत्रणा विस्कळीत झाली आहे.अधिकाऱ्यांच्या निष्काळजीपणावर ओढले ताशेरे!या गंभीर परिस्थितीची दखल घेत माजी सभापती पै. शामभाऊ कानगुडे यांनी स्वतः पुढे येत महावितरणच्या कारभारावर तीव्र संताप व्यक्त केला. “अधिकारी आणि कर्मचारी ग्राहकांच्या समस्यांकडे जाणीवपूर्वक दुर्लक्ष करत आहेत. नागरिकांनी नियमित वीजबिल भरूनही त्यांना हक्काची वीज का मिळत नाही?” असा संतप्त सवाल त्यांनी उपस्थित केला आहे….तर महावितरण कार्यालयाला घेराव घालणार!पै. शामभाऊ कानगुडे यांनी महावितरणच्या राशिन शाखेच्या अधिकारी आणि कर्मचाऱ्यांना कडक शब्दांत सुनावले आहे की, पुढील आठ दिवसांच्या आत राशीन व परिसरातील विद्युत पुरवठा पूर्ण दाबाने आणि सुरळीत केला गेला पाहिजे. अन्यथा, संतप्त नागरिक, शेतकरी आणि व्यापाऱ्यांना सोबत घेऊन वीज मंडळाच्या कार्यालयावर धडक मोर्चा काढत तीव्र आंदोलन केले जाईल.आता महावितरण प्रशासन या इशाऱ्यानंतर खडबडून जागे होणार की आंदोलनाची ठिणगी पडणार, याकडे संपूर्ण राशीन परिसराचे लक्ष लागले आहे.