वटवृक्ष कोसळला; अण्णांचा ‘अनेक उत्तम आशीर्वाद’ हा शब्द मनात घोळतोय
कर्जत | प्रतिनिधी :- रयत शिक्षण संस्थेत तब्बल ४० वर्षे ज्ञानदानाचे कार्य करणारे, आपल्या प्रेमळ स्वभावाने आणि आशीर्वादाच्या शब्दांनी असंख्य मने जिंकणारे कै. मच्छिंद्र भीमराव तनपुरे (अण्णा) यांच्या निधनाने परिसरावर शोककळा पसरली आहे. वयाच्या ८८व्या वर्षी त्यांनी अखेरचा श्वास घेतला. त्यांच्या निधनाने कुटुंबीय, विद्यार्थी, माजी विद्यार्थी आणि परिचितांमध्ये हळहळ व्यक्त होत आहे.
अण्णा हे केवळ शिक्षक नव्हते, तर अनेकांच्या आयुष्यातील मार्गदर्शक आणि आधारवड होते. रयत शिक्षण संस्थेत त्यांनी सुमारे चार दशके सेवा बजावत असताना असंख्य विद्यार्थ्यांच्या आयुष्याला आकार दिला. त्यांच्या साधेपणातून, शिस्तीतून आणि माणुसकीच्या वागणुकीतून अनेक पिढ्यांनी प्रेरणा घेतली.
त्यांच्या भेटीतून निरोप घेताना अण्णांच्या तोंडून हमखास ऐकायला मिळणारे ‘अनेक उत्तम आशीर्वाद’ हे शब्द आजही अनेकांच्या मनात घर करून आहेत. त्यांच्या या दोन शब्दांत आपुलकी, आशीर्वाद आणि मायेची ऊब असायची. आज अण्णा आपल्यात नसले तरी त्यांचा तो आशीर्वादाचा स्वर अनेकांच्या स्मरणात कायम घुमत राहणार आहे.
‘वटवृक्ष कोसळला’ अशीच भावना त्यांच्या निधनानंतर व्यक्त होत आहे. ज्ञान, संस्कार आणि माणुसकीची सावली देणारा हा आधारवड हरपल्याने अनेकांच्या डोळ्यांत अश्रू तरळले आहेत.
कै. मच्छिंद्र भीमराव तनपुरे यांच्या दशक्रिया विधीचा कार्यक्रम मंगळवार, दि. २५ ऑगस्ट २०२६ रोजी सकाळी ८ वाजता श्री क्षेत्र सिद्धटेक, ता. कर्जत, जि. अहिल्यानगर येथे होणार आहे. प्रवचनकार ह.भ.प. शिवाजी महाराज मचाले (इनामगाव) यांच्या उपस्थितीत धार्मिक विधी पार पडणार आहेत.
अण्णांनी आयुष्यभर दिलेले संस्कार, विद्यार्थ्यांना दिलेले मार्गदर्शन आणि शेवटी उच्चारलेला ‘अनेक उत्तम आशीर्वाद’ हा शब्दच त्यांच्या आठवणींची सर्वात मोठी शिदोरी ठरणार आहे.
