एमपीएससी परीक्षेत विक्रीकर निरीक्षकपदी निवड झाल्याबद्दल करीम शेख यांचा हशू आडवाणी विद्यालयात सत्कार
राशीन (प्रतिनिधी जावेद काझी):
समाज विकास संस्थेच्या हशू आडवाणी माध्यमिक व उच्च माध्यमिक विद्यालयाचा माजी विद्यार्थी करीम शकील शेख याने एमपीएससी (MPSC) परीक्षेत उत्तुंग यश मिळवत विक्रीकर निरीक्षक (STI) पदाला गवसणी घातली आहे. या उल्लेखनीय यशाबद्दल विद्यालयाच्या वतीने त्यांचा नुकताच भव्य नागरी सत्कार करण्यात आला.
कार्यक्रमाच्या अध्यक्षस्थानी अल्लाउद्दीन एस. काजी होते. कार्यक्रमाचे प्रास्ताविक प्राध्यापक मुस्ताक शेख यांनी केले. प्रास्ताविकादरम्यान त्यांनी करीम शेख यांच्या यशाचे कौतुक करत विद्यालयासाठी हा अत्यंत अभिमानाचा क्षण असल्याचे सांगितले…
जिद्द आणि सातत्याच्या बळावर यश
सत्काराला उत्तर देताना करीम शेख यांनी विद्यार्थ्यांशी संवाद साधून आपला संघर्षाचा व प्रेरणादायी प्रवास उलगडला. “जिद्द, चिकाटी, अभ्यासातील सातत्य आणि ध्येयाप्रती प्रामाणिकपणा ठेवल्यास कोणत्याही अडचणींवर मात करून यश मिळवता येते,” असा विश्वास त्यांनी व्यक्त केला.
मोबाईल व सोशल मीडियापासून दूर राहण्याचे आवाहन
स्पर्धा परीक्षेची तयारी करणाऱ्या आणि शालेय विद्यार्थ्यांना मार्गदर्शन करताना करीम शेख म्हणाले, “विद्यार्थ्यांनी मोबाईलचा अनावश्यक वापर टाळावा आणि सोशल मीडियापासून शक्य तितके दूर राहावे. अभ्यासासोबतच दररोज अवांतर वाचनाची सवय आत्मसात करणे अत्यंत गरजेचे आहे.”
दिग्गजांची उपस्थिती
या सोहळ्यास करीम शेख यांचे वडील शकील शेख, बंधू रहीम शेख, वृक्षमित्र मयूर धनवडे, विद्यालयाचे प्राचार्य राजेंद्र नष्टे, तसेच सर्व शिक्षक, शिक्षकेतर कर्मचारी आणि विद्यार्थी मोठ्या संख्येने उपस्थित होते.
कार्यक्रमाचा समारोप प्राध्यापक साळवे यांच्या आभार प्रदर्शनाने झाला. करीम शेख यांच्या या यशामुळे राशीन परिसरातील आणि विद्यालयातील विद्यार्थ्यांना स्पर्धा परीक्षांकडे पाहण्याची नवी दिशा व प्रेरणा मिळाली आहे…
