दादा पाटील महाविद्यालयात संविधान दिन साजरा
रयत शिक्षण संस्थेच्या दादा पाटील महाविद्यालयात २६ नोव्हेंबर २०२५ रोजी संविधान दिनानिमित्त राज्यशास्त्र, सांस्कृतिक विभाग, राष्ट्रीय सेवा योजना व विद्यार्थी विकास मंडळ यांच्यावतीने ‘भारतीय संविधान व आजचा युवक’ या विषयावर डॉ. दत्तात्रय शेंडे यांचे व्याख्यान आयोजित करण्यात आले होते. कार्यक्रमाच्या अध्यक्षस्थानी उपप्राचार्य डॉ. प्रमोद परदेशी होते.
‘भारतीय संविधान व आजचा युवक’ या विषयावर बोलताना डॉ. शेंडे यांनी सांगितले की, आपले संविधान केवळ कायद्यांचा संग्रह नसून, ते भारताच्या भवितव्याचे दस्तऐवज आहे. स्वातंत्र्य, समता, न्याय आणि बंधुता यावर आधारित समाज निर्माण करणे हे त्याचे उद्दिष्ट आहे. संविधानातील मूलभूत हक्क आणि कर्तव्ये युवकांनी समजून घेण्याचे आवाहन याप्रसंगी केले. भारतीय संविधानाची ऐतिहासिक पार्श्वभूमी, डॉ. बाबासाहेब आंबेडकर यांच्या योगदानावर तसेच संविधानाची प्रस्तावना यावर भाष्य केले.
अध्यक्षीय मनोगतात डॉ. प्रमोद परदेशी यांनी सांगितले की, नागरिकांच्या मूलभूत कर्तव्यांवर भर दिला गेला पाहिजे. हक्क आणि कर्तव्य या एकाच नाण्याच्या दोन बाजू आहेत. कर्तव्यांचे पालन केल्याशिवाय हक्कांची यथार्थतेपासून अपेक्षा करू नये असे सांगितले.
प्राचार्य डॉ संजय नगरकर यांच्या मार्गदर्शनाखाली या व्याख्यानाचे आयोजन महाविद्यालयात करण्यात आले होते. कार्यक्रमाचे प्रास्ताविक डॉ. कैलास रोडगे, आभार प्रा. सागर शिंदे यांनी तर सूत्रसंचालन प्रा. स्वप्नील म्हस्के यांनी केले. या कार्यक्रमाला महाविद्यालयातील प्राध्यापक व विद्यार्थी उपस्थित होते.
