कर्जतमध्ये रंगणार ‘महाराष्ट्र केसरी’ कुस्तीचा थरार!

कर्जत-जामखेड, अहिल्यानगर.ता.14- महाराष्ट्र कुस्तीगीर परिषदेच्या मान्यतेने कर्जत-जामखेड मतदारसंघात प्रथमच प्रतिष्ठेच्या ‘महाराष्ट्र केसरी’ कुस्ती स्पर्धेचे आयोजन करण्यात आले असून, या स्पर्धेसाठी बांधण्यात आलेल्या मैदानाचे पूजन आमदार रोहित पवार यांच्या हस्ते १५ मार्च रोजी होणार आहे. कर्जतमधील दादा पाटील महाविद्यालयाशेजारील मैदानावर सकाळी १० वाजता हा सोहळा पार पडणार आहे. यावेळी महाराष्ट्र कुस्तीगीर परिषदेचे पदाधिकारी, कुस्तीपटू देखील उपस्थित राहणार आहेत.

२६ ते ३० मार्च दरम्यान होणाऱ्या या महाराष्ट्र केसरी कुस्ती स्पर्धेत राज्यातील विविध वजनी गटातील ९०० हून अधिक नामांकित मल्ल सहभाग घेणार आहेत. विशेष म्हणजे आजवर ‘महाराष्ट्र केसरी’ ची गदा पटकावलेले सर्व विजेतेही या महाराष्ट्र केसरी कुस्ती स्पर्धेला हजेरी लावणार आहेत. तसेच, तब्बल ४० वर्षापासून महाराष्ट्र कुस्तीगीर परिषदेचे अध्यक्ष राहिलेले आणि कुस्ती क्षेत्राला नवी दिशा देणारे ज्येष्ठ नेते, माजी केंद्रीय मंत्री शरदचंद्र पवार यांचीही स्पर्धेच्या समारोपाला उपस्थिती राहणार आहे. या स्पर्धेच्या नियोजनात आंतरराष्ट्रीय स्तरावरील उत्तम सुविधा, राष्ट्रीय व आंतरराष्ट्रीय पंचांची नेमणूक, तसेच गुणवत्तेनुसार विजेता ठरावा यासाठी कोणताही राजकीय हस्तक्षेप न होण्याची विशेष काळजी घेतली जाणार आहे. तसेच या कुस्ती स्पर्धेमध्ये निर्णय घेताना तुसभरही चुक होऊ नये यासाठी अत्याधुनिक तंत्रज्ञानाचा वापर करण्यात येणार आहे. कुस्तीला आंतरराष्ट्रीय दर्जाच्या सुविधा मिळाव्यात आणि मल्लांना योग्य प्रशिक्षण व संधी उपलब्ध व्हावी, हा या स्पर्धेचा प्रमुख उद्देश असून ही ऐतिहासिक महाराष्ट्र केसरी कुस्ती स्पर्धा पाहण्यासाठी देशासह राज्यभरातून कुस्तीप्रेमींनी उपस्थित राहावे, असे आवाहन आयोजकांच्या वतीने करण्यात आले आहे.