कर्जत येथे बेकायदेशीर सावकारी प्रकरण; दोन आरोपींवर गुन्हा दाखल

कर्जत, ता. 9 जानेवारी 2025: कानगुडवाडी (ता. कर्जत, जि. अहिल्यानगर) येथे बेकायदेशीर सावकारी प्रकरण उघडकीस आले असून दोन आरोपींविरुद्ध कर्जत पोलीस ठाण्यात गुन्हा दाखल करण्यात आला आहे.

फिर्यादी जालिंदर दत्तू कानगुडे (वय 40, रा. कानगुडवाडी) यांनी दिलेल्या तक्रारीनुसार, आरोपी संग्राम गौतम कानगुडे आणि गौतम लक्ष्मण कानगुडे (दोन्ही रा. कानगुडवाडी) यांनी त्यांना विना परवाना सावकारीचे पैसे व्याजाने दिले होते. त्यावरून अधिक व्याजाची बेकायदेशीर आकारणी केली जात होती. तसेच, या रकमेच्या वसुलीसाठी धमकावण्यात आले होते.

सदर घटना 10 ऑगस्ट 2024 पासून 17 डिसेंबर 2024 दरम्यान कानगुडवाडी परिसरात घडल्याचे फिर्यादीने नमूद केले आहे. पोलिसांनी महाराष्ट्र सावकारी अधिनियम 2024 च्या कलम 39 तसेच भारतीय दंड संहिता कलम 351(2) आणि 351(3) अंतर्गत गुन्हा नोंदवला आहे.

पुढील तपास पोलीस हवालदार एम. काळे करत आहेत. कर्जत पोलीस ठाण्याचे प्रभारी अधिकारी पोलीस निरीक्षक दौलतराव जाधव यांच्या मार्गदर्शनाखाली प्रकरणाचा तपास सुरू आहे.

ही कारवाई कर्जत पोलीस ठाण्यातील पोलीस हवालदार एस. बी. वाबळे आणि एम. काळे यांनी फिर्यादीच्या तक्रारीनुसार केली.