कर्जतमध्ये नवरात्रोत्सवाचा उत्साह शिगेला; महिला व बालकांचा सांस्कृतिक उपक्रमांत सहभाग
कर्जत (प्रतिनिधी) : संत शिरोमणी श्री सेना महाराज मंदिरात नवरात्रोत्सवानिमित्त घटस्थापना करून देवीची प्रतिष्ठापना करण्यात आली आहे. नवरात्रोत्सवाच्या पार्श्वभूमीवर मंदिरात दररोज विविध धार्मिक व सांस्कृतिक कार्यक्रमांचे आयोजन करण्यात येत असून, संपूर्ण परिसर भक्तिमय वातावरणाने भारावून गेला आहे. कर्जत परिसरातील महिला व भाविक नागरिकांचा या उत्सवाला उत्स्फूर्त प्रतिसाद मिळत आहे.
नवरात्रोत्सवाच्या काळात दररोज सायंकाळी ८ वाजता देवीची आरती करण्यात येते. यावेळी परिसरातील महिला मोठ्या भक्तिभावाने सहभागी होतात. देवीची सुंदर भक्तिगीते गायली जात असून, पारंपरिक देवीचे खेळही रंगतदार पद्धतीने खेळले जातात. आरतीनंतर भाविकांना उपवासाच्या महाप्रसादाचे वाटप करण्यात येते. त्यामुळे मंदिर परिसरात दररोज धार्मिक उत्साह आणि भक्तीचा अनोखा संगम पाहायला मिळत आहे.
धार्मिक कार्यक्रमांसोबतच लहान मुला-मुलींसाठी विविध सांस्कृतिक उपक्रम राबविण्यात येत आहेत. तसेच महिलांसाठी गरबा नृत्याचे आयोजन करण्यात आले आहे. या उपक्रमांमुळे महिलांना आपली कला सादर करण्याची, तर लहान मुलांना सांस्कृतिक कार्यक्रमांत सहभागी होण्याची संधी मिळत आहे. धार्मिक परंपरांचे जतन करण्यासोबतच सामाजिक एकोपा आणि सांस्कृतिक वारसा वृद्धिंगत करण्याचा प्रयत्न या माध्यमातून केला जात आहे.
या नवरात्रोत्सवाचे आयोजन श्री जिवाजी महाले युवा प्रतिष्ठानचे अध्यक्ष श्री. नामदेव थोरात यांच्या मार्गदर्शनाखाली करण्यात आले आहे. उत्सव यशस्वी करण्यासाठी अनिल थोरात, यशवंत थोरात, कैलास थोरात, अमोल थोरात, योगेश थोरात, सागर थोरात, सुरज शेळके, संतोष थोरात, ओंकार थोरात, कुणाल माने, संदेश जाधव, राम शेळके, किरण काशीद, भीमराव थोरात, अनिकेत थोरात आणि प्रणव थोरात यांच्यासह प्रतिष्ठानचे सदस्य परिश्रम घेत आहेत.
नवरात्रोत्सवाच्या निमित्ताने मंदिरात दररोज भक्तिमय वातावरण अनुभवायला मिळत असून, महिला, बालकांसह परिसरातील नागरिक मोठ्या उत्साहाने सहभागी होत आहेत. धार्मिक श्रद्धा, पारंपरिक संस्कृती आणि सामाजिक एकात्मतेचा सुंदर मिलाफ या उत्सवाच्या माध्यमातून अनुभवायला मिळत आहे.
