आबांची इच्छा पूर्ण करण्यासाठी माहूरगड ते माळंगी ज्योत यात्रा; महेश आबांच्या स्मृतींना भावपूर्ण उजाळा!
कर्जत (प्रतिनिधी) : गावाचे नेतृत्व, समाजसेवेची तळमळ आणि ग्रामस्थांशी जिव्हाळ्याचे नाते जपणारे माळंगी गावचे माजी सरपंच स्वर्गीय महेश (आबा) जगताप आज आपल्यात नसले, तरी त्यांच्या आठवणी आणि विचार आजही ग्रामस्थांच्या मनात जिवंत आहेत. आबांची माहूरगड येथून ज्योत आणण्याची अपूर्ण राहिलेली इच्छा पूर्ण करण्यासाठी महेश आबा मित्र मंडळाच्या वतीने माहूरगड ते माळंगी ज्योत यात्रेचे आयोजन करण्यात आले आहे. सुमारे ४५० किलोमीटरचा हा श्रद्धेचा प्रवास आबांच्या स्मृतींना समर्पित करण्यात आला आहे.
स्वर्गीय महेश आबा जगताप यांचे गावावरील प्रेम, सामाजिक कार्य आणि माळंगीच्या विकासासाठी त्यांनी पाहिलेली स्वप्ने ग्रामस्थांसाठी आजही प्रेरणादायी आहेत. आबांची इच्छा पूर्ण व्हावी आणि त्यांच्या स्मृतींना अनोख्या पद्धतीने उजाळा मिळावा, या भावनेतून मित्र मंडळाच्या कार्यकर्त्यांनी या ज्योत यात्रेचा संकल्प केला. श्रद्धा, भक्ती आणि निष्ठेच्या भावनेतून सुरू झालेल्या या उपक्रमामुळे माळंगी गावात भावनिक आणि भक्तिमय वातावरण निर्माण झाले आहे.
आबा प्रत्यक्षात सोबत नसले, तरी त्यांनी दिलेली प्रेरणा आणि गावासाठी केलेले कार्य आजही ग्रामस्थांच्या स्मरणात आहे. त्यांच्या अपूर्ण इच्छेची पूर्तता करण्यासाठी उचललेले हे पाऊल म्हणजे केवळ ज्योत यात्रा नसून, आबांप्रती असलेल्या प्रेमाचे, आदराचे आणि कृतज्ञतेचे प्रतीक ठरत आहे.
आबांच्या स्मृती जपण्याच्या आणि त्यांनी पाहिलेली स्वप्ने पुढे नेण्याच्या या प्रयत्नाला मिळालेल्या सहकार्यामुळे उपक्रमाला विशेष महत्त्व प्राप्त झाले आहे. महेश आबा मित्र मंडळाच्या कार्यकर्त्यांनी पुढाकार घेत आबांच्या इच्छापूर्तीसाठी केलेला हा प्रयत्न ग्रामस्थांच्या भावनांशी जोडला गेला आहे.
“आबा आज आपल्यात नसले, तरी त्यांच्या आठवणी, विचार आणि स्वप्ने कायम आपल्या सोबत आहेत. त्यांची इच्छा पूर्ण करणे, हीच त्यांना खरी श्रद्धांजली आहे,” अशी भावना या उपक्रमामागे व्यक्त होत आहे.
