ओव्हरलोडिंग वाहने मोकाटच ! प्रकल्पाच्या नावाखाली गौण खनिजाची नियमबाह्य वाहतूक; महसूलचे दुर्लक्ष.
कर्जत (प्रतिनिधी) :- कर्जत तालुक्यात रस्ता रुंदीकरणाचे काम गेल्या वर्षांपासून सुरू आहे. कंपनीकडून रस्ते कामास आवश्यक गौण खनिजांच्या वाहतुकीसाठी तालुक्यातील अनेक रस्ते वापरात आणले. या रस्त्यांची पुरती वाट लागली आहे. कंपनीच्या ओव्हरलोडिंग धावणाऱ्या वाहनांवर कोणाचेच नियंत्रण नाही.
सरकारी प्रकल्पाच्या नावाखाली गौण खनिजाची नियमबाह्य वाहतूक करण्यात येत असल्याचे चित्र आहे. दंडात्मक कारवाई करणाऱ्या महसूल, परिवहन,पोलिस विभागाला ठेकेदारांचीओव्हरलोडिंग वाहने दिसत नाहीत का,हा प्रश्न उपस्थित होत आहे.
ओव्हरलोडिंग धावणाऱ्या वाहनांमुळे वारंवार अपघाताच्या घटना घडत आहेत. ओव्हरलोडिंग धावणारी वाहने व रात्रंदिवस सुरू असणारी गौण खनिजांची नियमबाह्य वाहतूक हे कळीचे मुद्दे आहेत.
दहाचाकी ट्रकची मालवाहतूक क्षमताही १६ टनापर्यंत असते. प्रत्यक्षात मात्र २२ ते २५ टन मालाची वाहतूक करण्यात येते. शासनाचा गौण खनिज वाहतुकीसाठीचा नियम साडेतीन ब्रास इतका आहे. प्रत्यक्षात वाहतूक मात्र दुप्पट क्षमतेने म्हणजेच सात ब्रासपेक्षा अधिक करण्यात येते. त्याकडे संबंधित यंत्रणाचे दुर्लक्ष असल्याचे चित्र दिसत आहे.
रस्त्याच्या नशिबी वनवासच…
अनेक गावांत रस्ता रुंदीकरणाचे काम सुरू आहे. या कामाला लागणारे गौण खनिज आणताना ओव्हरलोडिंग वाहनांमुळे तालुक्यातील बहुसंख्य गावातील रस्त्यांची वाट लागली आहे. ग्रामीण भागातील जनतेला रस्त्यावरील खडी चुकवत आणि ठेचा खात मार्गक्रमण करावे लागत आहे.
