अवैध गांजाची लागवड मिरचीच्या पिकात कर्जत पोलिसांची मोठी कारवाई.
कर्जत प्रतिनिधी : – आळसुंदे परिसरात कर्जत पोलिसांनी गांजाची शेती करणाऱ्यावर छापा टाकून मोठी कारवाई केली. या कारवाईत ४ लाख २९ हजार ८२० रुपयांचा एकुण २१.४९१ किलो ग्रॅम वजनाचा गांजा जप्त करून आरोपीस ताब्यात घेतले आहे. याबाबतची माहिती अशी, कर्जत पोलिसांना गुप्त बातमीदारामार्फत अळसुंदे ते कोर्टी रस्त्याच्या बाजुला असणाऱ्या एका शेतात गांजा पिकाची लागवड केली असल्याची माहिती मिळाली. त्यानुसार पोलिसांनी छापा टाकून गांजा जप्त केला. या कारवाईमध्ये सुमारे २१ किलो वजनाचा ओलसर झाडे असलेला हिरव्या रंगाचा गांजा जप्त केला.
बाळू मारुती गार्डी, वय ४५ वर्षे, रा. अळसुंदे, ता. कर्जत याने त्याच्या गट नंबर ३३० मधील शेतात मिरचीच्या पिकात गांजाची झाडे लावल्याचे निष्पन्न झाले. पोलिसांनी त्यास ताब्यात घेवून कर्जत पोलीस स्टेशनमध्ये त्याच्याविरुध्द गुन्हा दाखल केला आहे. उपविभागीय पोलीस अधिकारी विवेकानंद वाखारे यांच्या मार्गदर्शनाखाली पोलीस निरीक्षक घनशाम बळप, पोलीस उपनिरीक्षक प्रदिप बोऱ्हाडे, मंगेश नागरगोजे व पोलिसांच्या पथकाने ही कारवाई केली. महसूल व कृषी विभागाचे कर्मचारीही या कारवाईत सहभागी होते.
