शेतकरी जीवन, गावची संस्कृती आणि कर्जतची पाहुणचार– अमेरिकन पाहुणा भारावला!
ग्रामीण भागात गावगाडा कसा चालतो आणि येथील लोकांचे जीवनमान कसे आहे, तेथील ग्रामपंचायतीचा कारभार कशाप्रकारे चालवला जातो, हे पाहण्याची प्रचंड इच्छा असलेले अमेरिकेतील शानन ब्रँडन कॅमन यांनी काल कुळधरण येथे भेट दिली.
शानन बँडन कॅमन हे अमेरिका वॉशिंग्टन सिएटल येथे बोईंग या विमान कंपनीत इंजिनिअर म्हणून कार्यरत आहेत. भारतातील ग्रामीण भागातील जीवनमान कसे आहे, तेथील बाजारपेठ कशी आहे, लोकांचा मुख्य व्यवसाय काय, येथील शिक्षण पद्धती कशी आहे, शेती व्यवसाय कसा चालतो, हे पाहण्याची त्यांना इच्छा होती म्हणूनच त्यांनी कुळधरण येथे सहकार सोसायटी आणि ग्रामपंचायत कार्यालयाला भेट देऊन येथील परिस्थितीची माहिती घेतली. सहकाराचा कारभार कसा चालतो, शेतकऱ्यांना कशाप्रकारे मदत केली जाते, हे मंगेश
जगताप यांनी सांगितले. शेती विषयक माहिती राहुल निंभोरे यांनी दिली. ग्रामपंचायत योजना आणि ग्रामपंचायतचा कारभार कसा चालतो, ग्रामपंचायत काय सुविधा देते, गावची स्वच्छता कशी राखली जाते, हे कुळधरण ग्रामपंचायतचे ग्रामाधिकारी विजयकुमार बनाते यांनी सांगितले. गावाकडील साधी माणसे पाहून त्यांच्याशी चर्चा
करून त्यांना फार आनंद झाला. थोडीफार मराठी त्यांना समजत होती, ते बोलण्याचा पण प्रयत्न करत होते.
मंगेश जगताप यांचे साडू बंधू बाळासाहेब भोईटे यांची कन्या अमृता यांचे ते सहकारी आहेत. अमृतादेखील अमेरिकेतच जॉब करते. अमृताचे आई-वडील मयुरी जगताप हेदेखील त्यांच्या
समवेत होते. या वेळी कुळधरण सहकार सोसायटी आणि कुळधरण ग्रामपंचायत कार्यालयात त्यांचा सन्मान करण्यात आला. यावेळी मार्केट कमिटीचे संचालक मंगेश जगताप कुळधरणचे सरपंच संतोष जगताप, दादासाहेब खराडे, सतीश सुद्रिक, राहुल निंभोरे, शिवराज जगताप, ग्रामपंचायत कर्मचारी व ग्रामस्थ उपस्थित होते.
