कर्जत (प्रतिनिधी) :- कर्जत येथील ग्रामदैवत श्री संत सद्गुरु गोदड महाराज यांच्या जन्मदिवसाच्या निमित्ताने पाटील गल्ली येथील ध्यान मंदिर येथे विविध धार्मिक कार्यक्रमांचे आयोजन करण्यात आले होते. जन्मोत्सव सोहळ्यानिमित्त घरोघरी सडा, रांगोळी, तोरण व गुढी उभारून महाराजांच्या जन्माचे स्वागत केले. यावेळी हभप दयानंद महाराज कोरेगावकर यांचे हरिकीर्तन झाले. किर्तनानंतर महाआरती करण्यात आली.
तब्बल पन्नास ते साठ हजार लिटर शिंपी आमटी, १०० पोते गव्हाच्या चपात्या अशा भव्य महाप्रसादाचे आयोजन करत कर्जत येथे श्री संत सद्गुरू गोदड महाराज यांचा जन्मोत्सव सोहळा मोठ्या उत्साहात व भक्तीभावाने साजरा झाला.
कर्जत तालुका तालीम संघाचे अध्यक्ष, माजी जिल्हा परिषद सदस्य पै. प्रवीण घुले पाटील यांनी गोदड महाराजांचा जीवनपट उलगडून दाखवला. यानंतर राबविण्यात येणाऱ्या उपक्रमांची माहिती दिली. आलेल्या सर्वांचे स्वागत करून आभार मानले. जन्मोत्सवानिमित्त तब्बल ५० ते ६० हजार लिटर शिपी आमटी बनवण्यात आली होती. शिंपी आमटीच्या महाप्रसादाचा लाखो भाविकांनी लाभ घेतला.
गेल्या बारा वर्षांपासून अखंडपणे सुरू आहे. शंभर भाविकांच्या प्रसादापासून ही परंपरा सुरू झाली होती, ती आता लाखो भाविकांच्या महाप्रसादापर्यंत पोहोचली आहे.
