कर्जत तालुका सकल मराठा समाजाचा ऐतिहासिक निर्णय; रावसाहेब धांडे यांची प्रमुख समन्वयकपदी फेरनिवड…
मागील वर्षातील कार्य व शिवजयंती उत्सवाच्या यशस्वी आयोजनानंतर समाजाचा एकमुखी कौल
कर्जत (अहिल्यानगर ) : कर्जत तालुका ‘सकल मराठा समाज’ व ‘शिवजयंती उत्सव समिती’च्या प्रमुख समन्वयकपदी शिवश्री रावसाहेब महादेव धांडे यांची सन २०२५-२६ या वर्षासाठी सर्वानुमते फेरनिवड करण्यात आली. मागील वर्षात समाजहितासाठी राबवलेल्या विविध उपक्रमांचा तसेच शिवजयंती उत्सवाच्या यशस्वी आयोजनाचा सविस्तर आढावा घेत समाजाने हा ऐतिहासिक निर्णय एकमताने घेतला.
रविवार, दि. १४ डिसेंबर २०२५ रोजी कर्जत येथील मराठी मुलांच्या शाळेत सकल मराठा समाजाची विशेष बैठक पार पडली. या बैठकीत मागील वर्षातील सामाजिक उपक्रम, संघटनात्मक कामकाज आणि शिवजयंती उत्सवाच्या आयोजनाबाबत सविस्तर चर्चा करण्यात आली.
गतवर्षी शिवजयंती उत्सव शिस्तबद्ध, शांततापूर्ण आणि उत्साही वातावरणात साजरा झाल्याबद्दल उपस्थित समाजबांधवांनी समाधान व्यक्त केले. रावसाहेब धांडे यांच्या नेतृत्वाखाली केलेल्या नियोजन, समन्वय आणि कार्यपद्धतीचे विशेष कौतुक करण्यात आले.
या पार्श्वभूमीवर आगामी वर्षासाठी कार्यकारिणी निवडीबाबत चर्चा होऊन, सर्व उपस्थित समाजबांधवांनी एकमताने पुन्हा एकदा रावसाहेब धांडे यांचीच प्रमुख समन्वयकपदी फेरनिवड करण्याचा निर्णय घेतला. समाजाच्या संघटनात्मक वाटचालीत हा निर्णय महत्त्वाचा व ऐतिहासिक टप्पा मानला जात आहे.
फेरनिवडीनंतर मनोगत व्यक्त करताना रावसाहेब धांडे म्हणाले, “माझ्यावर दाखवलेल्या विश्वासाबद्दल सकल मराठा समाजाच्या सर्व सदस्यांचा मी मनःपूर्वक आभारी आहे. समाजाच्या विविध प्रश्नांचा सातत्याने पाठपुरावा केला जाईल. आगामी शिवजयंती उत्सव पूर्वीपेक्षाही अधिक उत्साहात, शिस्तबद्ध आणि भव्य स्वरूपात साजरा करण्यात येईल.”
रावसाहेब धांडे यांच्या फेरनिवडीमुळे कर्जत तालुक्यातील मराठा समाजात समाधानाचे व उत्साहाचे वातावरण निर्माण झाले असून, समाजाच्या संघटनात्मक बळकटीसाठी घेतलेला हा निर्णय ऐतिहासिक ठरत असल्याची भावना व्यक्त केली जात आहे.
