कर्जत तालुका प्रेस क्लबचा उपक्रम स्तुत्य : पीएसआय अनंत सालगुडे
कर्जत (प्रतिनिधी) :- महापुरुषांच्या जयंतीनिमित्त कर्जत तालुका प्रेस क्लबने विद्यार्थ्यांसाठी घेतलेला चित्र रंगवा स्पर्धा हा उपक्रम स्तुत्य आहे. अशा उपक्रमांमुळे विद्यार्थ्यांच्या कलागुणांना वाव मिळतो. जिल्हा परिषद शाळेमध्ये उत्तम शिक्षण मिळते, त्यामुळे या शाळांमध्ये शिकणारे विद्यार्थी हे उच्च पदांवर कामे करत आहेत. विद्यार्थ्यांनी सर्वांगीण विकासासाठी अभ्यासाबरोबरच विविध स्पर्धांमध्ये सहभाग घ्यावा, असे आवाहन पोलीस उपनिरीक्षक अनंत सालगुडे यांनी केले. राशीन जिल्हा परिषद प्राथमिक शाळेमध्ये भारतरत्न डॉ. बाबासाहेब आंबेडकर व क्रांतीसुर्य महात्मा ज्योतिबा फुले यांच्या जयंतीनिमित्त कर्जत तालुका प्रेस क्लब आयोजित बक्षीस वितरण कार्यक्रमात ते बोलत होते. अध्यक्षस्थानी सरपंच नीलम साळवे होत्या.
यावेळी शिक्षण विस्तार अधिकारी उज्वला गायकवाड, ग्रामपंचायत सदस्या सारिका जाधव, शालेय व्यवस्थापन समितीचे अध्यक्ष अमोल जाधव, सचिन साळवे, पोलीस कॉन्स्टेबल अर्जुन पोकळे नितीन नरुटे, मुख्याध्यापक बापूराव वावगे, शरद सुद्रिक, प्रेस क्लबचे जिल्हा समन्वयक महादेव सायकर, उपाध्यक्ष प्रा. किशोर कांबळे, प्रा. किरण जगताप, प्रा. सोमनाथ गोडसे, मिलिंद राऊत यांच्यासह सर्व शिक्षक व विद्यार्थी उपस्थित होते.
या कार्यक्रमात चित्र रंगवा स्पर्धेमध्ये प्रथम क्रमांक मिळवलेल्या केतकी भाऊराव भांगरे हिला १५०१, द्वितीय क्रमांक मिळवलेल्या श्रेया प्रकाश साळवे १००१, तृतीय क्रमांक पटकावलेल्या वेदिका विशालबद्री काळे हिला ७५१ व पार्थ विक्रम काळे याला ५०१ रुपयांचे बक्षीस वितरित करण्यात आले. नीलम साळवे यांच्यावतीने विजेत्यांसाठी रोख बक्षीसे व शालेय साहित्य तर प्रेस क्लबच्या वतीने प्रशस्तीपत्र देण्यात आले. प्रास्ताविक प्रा. सोमनाथ गोडसे यांनी केले. सूत्रसंचालन शरद सुद्रिक यांनी केले तर महादेव सायकर यांनी आभार मानले.
